గాల్లో ఎగిరాక ?

తీరా గాల్లో
ఎగరడం ప్రారంభించాక గానీ

భూమ్మీద ఏమి
వదిలి వచ్చామో
తెలియదు

నేల మీద తిరుగుతున్నంత సేపూ
ఏమి పోగొట్టుకుంటున్నామో
సోయి ఉండదు

ఆనవాల్లు

కాల్చేసిన వంతెనలు
దాటాల్సిన
అగాధాల్ని గుర్తు చేస్తాయికాలదన్నుకున్న సంబంధాలు
కోల్పోయిన జీవితమై
వెంటాడుతాయి

స్వప్నరాహిత్యం

ఒక గొప్ప ప్రారంభం కోసం
అన్‌వేషణ
పేలవమైన ముగింపుగా
కొట్టుమిట్టాడుతుందివేయి తుపాకుల ముందుకూడా
తలవంచని ధైర్యం
తోవ తెలియని తనంతో
నీరు కారిపోతుంది

అపరిచిత జీవితం

కలల ధూళి ఎగిసి
కన్నీరు గరగర లాడకుండా
నల్లని రే-బాన్ కూలింగ్ గ్లాస్సెస్ పెట్టొచ్చు .రాత్రి దుఖ్కం
నిద్రలేమి కత్తులై కోయకుండా
ఎలక్ట్రిక్ హీటర్లలో
మొహం దాచుకోవచ్చు .

వేకువ సంధ్య

చెప్పలేని
దిగులు వ్యథలో
చలిని కప్పుకు వణికిన
ఒక ఎండు చేతుల రాత్రి -ఎర్రెర్రగా తొంగిచూస్తున్న
చెట్ల చిగుళ్ళ చిరునవ్వులను

కాలాన్ని వెనక్కి జరిపి
కౌగలించుకుంటుంది .