స్వప్నరాహిత్యం

ఒక గొప్ప ప్రారంభం కోసం
అన్‌వేషణ
పేలవమైన ముగింపుగా
కొట్టుమిట్టాడుతుందివేయి తుపాకుల ముందుకూడా
తలవంచని ధైర్యం
తోవ తెలియని తనంతో
నీరు కారిపోతుంది

తుఫాను ప్రచండతను
ఊపిరిగా పీల్చిన యవ్వనం
పత్రహరితం పరాధీనమై
చిరుగాలులకు సైతం
కంపించి పోతుంది

వాగునీటి గలగలల
పరిమళాలు వెదజల్లిన
వెన్నెల రాత్రుల అమాయకత్వం
విచ్చుకత్తులు దూసిన పేటెంట్ల మధ్య
అస్తిత్వం కోల్పోతుంది

కొత్త ఆకాశాల కోసం
అరమోడ్పు కళ్ళతో తపించిన
నెలవంక
గ్లోబలైజేషన్ స్వప్న రాహిత్యం లో
వెలవెల పోతుంది

భవిష్యత్తుపై
ప్రేమతో
వర్తమానాన్ని ధిక్కరించిన
ఆకాంక్ష
చరిత్ర చీకటినీడల్లో
గతం కన్నీటి మరకగా
మిగిలిపోతుంది

మార్కెట్ మాయాజాలంలో
ప్రతి మజిలీ దగ్గర
చౌరస్తా అయిపోయిన ప్రయాణం
తిరిగి తిరిగి ప్రారంభానికే
చేరిపోతుంది

- నారాయణస్వామి